اخراج شمار از مهاجرین افغان از تاجیکستان به دلیل نقض قوانین آن کشور

کمیته دولتی امنیت ملی تاجیکستان اعلام کرده که شماری از شهروندان افغانستان به دلیل نقض قوانین این کشور از تاجیکستان اخراج شده‌اند.

به گزارش خبرگزاری رشد؛ کمیته دولتی امنیت ملی تاجیکستان شب گذشته(۲۱ثور) اعلام کرده که شماری از شهروندان افغانستان به دلیل نقض قوانین این کشور از تاجیکستان اخراج شده‌اند.

این نهاد افزود: افرادی که اخراج شده‌اند، با وجود برخورداری از شرایطی مانند اقامت، کار، آموزش و امنیت، «به‌گونه جدی» قوانین تاجیکستان را نقض کرده‌اند.

در اعلامیه کمیته امنیت ملی تاجیکستان آمده که این اقدام پس از ثبت موارد مختلف جرمی از سوی برخی شهروندان افغانستان صورت گرفته است.

این موارد شامل قاچاق مواد مخدر، عضویت در گروه‌های هراس‌افکن، خشونت، استفاده از اسناد جعلی برای دریافت وضعیت پناهندگی، تلاش برای بی‌ثبات‌سازی وضعیت در کشور میزبان و ایجاد مراکز قمار عنوان شده است.

این نهاد همچنین گفته است یک رویداد جنایی اخیر در شهر خجند که در آن یک شهروند افغانستان به قتل یک زن ۲۷ ساله متهم شده، باعث نارضایتی در میان باشندگان محل شده است.

خبرگزاری رشد