اعضای طالبان: مقام‌های پیشین حکومت هرگز نمی‌توانند به افغانستان برگردند

به دنبال مصاحبه‌های حمدالله محب مشاور امنیت‌ ملی اشرف غنی، اعضای طالبان می‌گویند مقام‌های پیشین حکومت هرگز نمی‌توانند به افغانستان برگردند.

محب در مصاحبه‌هایی با رسانه‌های امریکایی گفت که طبق اطلاعات استخبارات امریکا، طالبان قصد داشت اشرف غنی را مانند داکتر نجیب‌الله اعدام کند.

محمد جلال، عضو کمیسیون فرهنگی طالبان در واکنش به مصاحبه محب در توییتی نوشت که مقامات پیشین حکومت تا موقع فرار، از امریکایی‌ها می‌خواست افغان‌ها را بمباران کنند. این عضو طالبان مقام‌های پیشین را متهم به خیانت کرد و گفت آنها دیگر هرگز نمی‌توانند به افغانستان برگردند.

پیش از این، طالبان با اعلام عفو عمومی از مقام‌های پیشین خواسته بودند که به افغانستان برگردند.

محب در مصاحبه با شبکه خبری سی‌بی‌اس، عدم درک تصمیم خروج امریکا از افغانستان را یکی از بزرگ‌ترین اشتباهات رهبری حکومت پیشین خواند و گفت که ما باید می فهمیدیم که آمریکا تصمیم گرفته است تحت هر شرایطی از افغانستان عقب‌نشینی می‌کند.