تاجیکستان تنها دولت افغانستان را به رسمیت می‌شناسد
رئیس مرکز تحقیقات استراتژیک رئیس جمهور تاجیکستان واکنش به برخی گزارش‌ها مبنی بر حمایت این کشور از طالبان اعلام کرد که تاجیکستان تنها حکومت افغانستان را به رسمیت می‌شناسد.
به گزارش رشد، «خدای بردی خالق نظراف» رئیس مرکز تحقیقات استراتژیک رئیس جمهور تاجیکستان اظهارداشت که دولت دوشنبه با گروههای مخالف دولت افغانستان مذاکره نمی‌کند.
وی در یک نشست خبری اعلام کرد که کشورش تنها حکومت مشروع در افغانستان را به رسمیت می‌شناسد و با هیچ گروه دیگری در خاک این کشور مذاکره نمی‌کند.
اوایل سالجاری یکی از مشاوران اشرف غنی که نخواسته نامش فاش شود به صدای آمریکا گفته بود که تاجیکستان نقش مهمی در ارتباط دیپلماتیک روسیه و طالبان دارد.
به گفته این مقام دولتی افغانستان، گروه طالبان همواره برای به رسمیت شناخته شدن توسط جامعه بین‌المللی تلاش می‌کند.
بر اساس این گزارش، روسیه تماسهای دیپلماتیک خود را با گروه طالبان افزایش داده است زیرا سعی دارد تا از نفوذ گروه تروریستی داعش در آسیای مرکزی جلوگیری کند.
از سوی دیگر چند هفته قبل نیز مقامات تاجیکستان در مورد ادعاهای مقامات افغان مبنی بر تعمیر سلاح‌های سنگین طالبان در این کشور اعلام کرده بودند که این ادعاها بی اساس است.
«محمد جان اولوغ خوجایف» سخنگوی گارد مرزی تاجیکستان، گفته بود که ادعاهای مقامات افغان “بی‌اساس” است اما در این باره تحقیق می‌کند.
مقامات سابق دولت افغانستان چندی قبل اعلام کرده بودند که خودروهای زرهی که پس از سقوط ولایت قندوز به دست طالبان افغان افتاده است، برای ترمیم توسط مهندسان روسی به تاجیکستان منتقل می‌شوند.
