سرپرست وزارت تحصیلات طالبان: فرستادن دختران به مکتب فرهنگ خارجی‌ها است
سرپرست وزارت تحصیلات عالی طالبان می‌گوید که فرستادن دختران به مکتب فرهنگ خارجی‌ها است.
ندامحمد ندیم، سرپرست وزارت تحصیلات عالی طالبان، در یک نوار تصویری که زمان پخش آن مشخص نیست و روز پنج‌شنبه، ۱۰ قوس، در دسترس ۸صبح قرار گرفته، این موضوع را بیان کرده است.
او افزوده که فرستادن دختران به مکتب فرهنگ خارجی‌ها است و این فرهنگ را امان‌الله خان و ظاهرشاه به افغانستان آوردند.
به گفته او، در آن زمان عالمان دین با این تصمیم امان‌الله خان مخالفت کردند.
ندیم تصریح کرده است: «در زمان ظاهر بزرگان قومی گفتند که غیرت، حیا و ایمان ما اجازه نمی‌دهد که دختران ما به مکتب بروند.»
سرپرست وزارت تحصیلات عالی طالبان خاطرنشان کرده است که عالمان دینی در زمان ظاهرشاه نیز به دلیل مخالفت‌شان ده‌ها سال زندانی شده بودند.
گفتنی است که طالبان پس از تسلط بر کشور، دروازه مکتب‌ها را به روی دختران بالاتر از صنف ششم بسته و آنان را از ادامه درس محروم کرده‌اند.
گزارشگر امنه احمدی
