تاجیکستان دو کنسولگری خود را در شمال کشور مسدود کرده است

مسوولان وزارت امور خارجه‌ی کشور اعلام کرده اند که جمهوری تاجیکستان تصمیم گرفته دو کنسولگری خود را در ولایات کندز و بدخشان ببندد.

به گزارش رشد، در خبرنامه‌ی وزارت امور خارجه آمده است که تاجیکستان با ارسال نامه‌یی به این وزارت، از این تصمیمش اطلاع داده است.

بر اساس خبرنامه، ظاهراً تاجیکستان به علت حملات اخیر بر کنسولگری‌های هند و پاکستان در ولایات ننگرهار و بلخ این تصمیم را گرفته است.

در نامه‌ی تاجیکستان آمده است که دولت تاجیکستان از اوضاع امنیتی در این ولایات سخت نگران است؛ اما در نامه گفته شده که این کار، روابط دوستانه میان کابل و دوشنبه را خدشه دار نخواهد ساخت.

شکیب مستغنی، سخنگوی وزارت خارجه کشور نیز در گفت‌‍وگو با بی‌بی‌سی این موضوع را تایید کرده است.

آقای مستغنی رسیدن نامه به وزارت خارجه را تایید کرده و گفته که آن‌ها یک سلسله نگرانی‌های کوچک امنیتی دارند. هر گاه همین نگرانی‌های امنیتی مرفوع شوند، کنسولگری‌های‌شان را در شهرهای فیض‌آباد و کندز بازگشایی خواهند کرد.”

تاجیکستان این تصمیم را در حالی اعلام کرده که کنسولگری‌های هند در شهر مزارشریف و پاکستان در شهر جلال‌آباد در کمتر از یک ماه گذشته مورد حمله قرار گرفتند.

این موضوع نگرانی‌های جدی را در پی داشته و ظاهراً کشورهایی که در افغانستان دفاتر دیپلوماتیک دارند، تصمیم‌های تازه‌یی خواهند گرفت.

رییس جمهور غنی نیز اخیراً در تماس تلیفونی را مقام‌های پاکستانی از تامین امنیت دیپلومات‌های این کشور اطمینان داده است.

با این حال، آقای مستغنی تاکید کرد که تامین امنیت و مصونیت دیپلمات‌ها و کارمندان نمایندگی‌های سیاسی و کنسولی خارجی در افغانستان در دستور کار نیروهای امنیتی ملی این کشور قرار دارد.